اتفاق

خوشونت سنگھ اپنی کتاب  ” سچ ، محبت اور ذرا سا کینہ “  میں ایک واقعہ بیان کرتے ہیں کہ وہ تقسیم ہند سے قبل اپنے ایک دہریے دوست اور اس کی فیملی کے ہمراہ غالبا لارنس گارڈن لاہور میں سیر تفریح کی غرض سے  گئے ہوئے تھے ۔ دوران کھیل  بچوں کی گیند ایک درخت کی بہت اونچی گھنی شاخوں میں پھنس گئی ۔  ہم سب نے مل کر کافی دیر بہت کوشش کی ، پتھر پھینکے گئے ، درخت ہلایا گیا لیکن گیند نے نہ اترنا تھا نہ اتری ۔ شاخوں میں پھنسی رہ گئی ۔ میرے منہ سے نکلا ” اب تو واہ گرو ہی اسے اتارے گا ” میرا دوست اتنی کوشش کے بعد چڑ سا گیا تھا ۔ کہنے لگا ” اگر واہگورو  یہ گیند خود بخود نیچے اتار دے تو میں اس پر ایمان لے آوں گا ” ۔ میں خاموش ہو گیا ۔ چند لمحوں کے بعد ناگہاں ایک بہت خفیف سا ہوا کا جھونکا آیا ، درخت کی شاخیں ہلیں اور گیند شاخوں سے پھسلتی ہوئی نیچے یوں آگری جیسے جادو کے زور سے نیچے گر پڑی ہو ۔ میرا دوست  ہنس کر کہنے لگا ” محض  اتفاق سے گری ہے ” ۔
بعض کام ہماری عادت بن جاتے ہیں اور ہم انہیں روٹین میں بے سوچے سمجھے کرتے ہیں ۔ میرے لیئے شروع سے ہی قرآن پاک کی تلاوت بھی ایک ایسا ہی کام تھا ۔ عام مسلمانوں کی طرح بچپن میں ہی مسجد میں قاری صاحب سے تیسویں پارے کی چند سورتیں رٹ لی تھیں ۔ بعد میں کچھ  آدھا قرآن حفظ کرنے کا موقع بھی ملا لیکن عربی زبان سے نابلد ہونے کی بنا پر تلاوت قرآن بلا سمجھے ایک مذہبی روٹین تھی جو میں ایک معمول کی طرح ادا کرتا تھا کہ ثواب ہوتا ہے ۔

بہت سال بیتے ، عملی زندگی میں آنے کے بعد ایک دن خیال آیا کہ قرآن کا فہم بھی ثواب سے زیادہ اہم ہے ۔ اس روز سے میں نے کوشش شروع کر دی کہ نماز فجر کے بعد آیات کی تلاوت کے علاوہ ترجمہ بھی ساتھ پڑھوں چاہے ایک آیت ہی کیوں نہ ہو اور دن کے باقی حصے میں اس آیت پر غور و فکر کیا جائے ۔ علاوہ ازیں تلاوت اس طرح کی جائے جیسے اللہ میاں مجھ سے براہ راست مخاطب ہیں ۔ جس طرح علامہ اقبال کے والد نے انہیں فرمایا تھا۔  میں صبح کی نماز کے بعد قلت وقت کے باعث کہیں سے بھی قرآن کھول کر بمشکل ایک آیت بمعہ ترجمہ ہی تلاوت کر پاتا تھا ۔ ایک دن  حسب معمول قرآن کھولا توسورہ طلاق کی زیر نظر تصویر میں دکھائی گئی آیت پر نظر پڑی ۔

اور جو کوئی خدا کا تقوی اختیار کرے گا وہ اس کے لئے (رنج و محن) سے مخلصی ( کی صورت) پیدا کر دے گا ۔ اور اس کو ایسی جگہ سے رزق دے گا جہاں سے ( وہم و ) گمان بھی نہ ہو اور جو خدا پر بھروسہ رکھے گا تو وہ اس کو کفایت کرے گا ۔ خدا اپنے کام کو (جو وہ کرنا چاہاتا ہے ) پورا کر دیتا ہے ۔ خدا نے ہر چیز کا اندازہ مقرر کر رکھا ہے

آیت اور ترجمہ پڑھنے کے بعد دفتر کی طرف گامزن وقت اور اس کے بعد باقی تمام دن  یہ  آیت ذہن میں گردش کرتی رہی ۔ نفس کہنے لگا یہ اللہ میاں نے کیا عجب بات کہی ہے ۔ ایسی جگہ سے رزق کی ترسیل جہاں سے وہم و گمان بھی نہ ہو اور خدا اپنا کام پورا کرتا ہے ۔ حالانکہ  جدید دنیا میں رزق کے ذرائع پر اللہ کی بجائے اس کے بندے قابض ہیں جنہوں نے عرصہ بیتا خدا کو اس دنیا سے دیس نکالا دے دیا ہے ۔ جسے چاہتے ہیں عطا کرتے ہیں ۔ جس کی چاہے معیشت تنگ کر دیتے ہیں  ۔ اس طرح کی بات کسی مذہبی منتر کا حصہ تو ہو سکتی ہے عقل کی نہیں۔میرے اندر کا سادہ اور کم علم  مسلمان حتی المقدور  نفس کے ساتھ مناظرہ  کر رہا تھا کہ یہ کتاب اللہ کی سچی اور آخری کتاب ہے اللہ نے اس کی حفاظت کا ذمہ لیا ہوا ہے ۔ تاریخ بتاتی ہے کہ یہ تحریف سے محفوظ رہی ہے ۔ تو شک کیوں ؟ ۔

نفس کہنے لگا بھئی اول تو یہ باتیں اساطیرالاولین ہیں ۔ مذہب اس دور میں پٹ چکا ہے عقل نے سائنس کی مدد سے اس دور میں مذہب کا جنازہ نکال دیا ہے اور تم کہتے ہو یہ آیت سچ ہے ۔ اچھا اگر یہ سچ بھی ہے تو اس کے مخاطب صرف مومنین ہیں جو صرف قرون اولی میں پائے جاتے تھے اور تم خود مانتے ہو کہ تم محض نام کے مسلمان ہو، مومن ہونے کی منزل سے کوسوں دور ہو ۔ اس لئے بس شانت رہ کر ڈگڈگی کی تال پر ناچتے رہو اور غیب سے روزی کی باتوں کی  بجائے اس دنیا کے روزی رسانوں کی باتوں پر زیادہ کان لگا کر دھیان دیا کرو۔ ہم نیک و بد حضور کو سمجھائے دیتے ہیں ۔
دونوں اپنی اپنی دفاعی پوزیشن پر ڈٹ گئے تھے ۔ چند روز اندرونی بحث کے دوران میرے اندر کے مسلمان کی مسلسل تکرار سے جب نفس عاجز آ گیا تو جھلا کر کہنے لگا ” اچھا اپنے اللہ سے کہو کہ تمہیں ایسی جگہ سے رزق بہم پہنچائے جس کا تمہیں وہم و گمان بھی نہ ہو ۔ کسی دوست یا رشتہ دار سے قرض مانگنے کے تم کبھی روادار نہیں رہے ۔ تنخواہ میں اضافہ بعید از قیاس ہے ۔ آسمان سے نوٹوں سے بھرا ہوا بریف کیس تمہاری جھولی میں گرنے سے رہا ۔ اپنے اللہ سے کہو اپنی آیت کو سچ ثابت کرے ، ورنہ چھوڑو ایسی باتیں ، بس ثواب  وغیرہ اور روٹین کی خاطر تلاوت کر لیا کرو لیکن خبردارجو ایسی باتوں پر اعتماد کیا ، یہ دور عقل کا ہے ، سائنس کا  ہے ، ترقی کا ہے ۔ ایسی باتیں دیوانے ہی سوچ سکتے ہیں ” ۔
نفس کی اس دھونس کے پیچھے بات یہ تھی کہ ان دنوں کسی ضرورت کے تحت مجھے کچھ معمولی رقم کی اشد ضرورت تھی ۔ بینک یا کسی اور ذریعے سے میں ادھار لینا نہیں چاہتا تھا لیکن ضرورت تھی کہ اپنی جگہ منہ کھولے بیٹھی تھی جس کا پورا ہونے کا کوئی امکان نہیں تھا ۔ ایک ہفتہ کے مناظرے میں مسلمان صاحب ذرا  کچے  ہو کر چپ سے ہو گئے تھے ۔ نفس خوشی کے عالم میں دھمالیں ڈاال رہا تھا ۔ دیکھا میں سچ  نہ کہتا تھا ۔ اب مسلمان صاحب بھی کچھ قائل ہو کر ، ممنوعہ لکیر عبور کر کے نفس کے ساتھ معاہدہ سقوط ڈھاکہ پر دستخط کرنے کے لئے تیاری کر رہے تھے ۔

اچانک دو تین روز بعد مجھے ایک خط بذریعہ ڈاک موصول ہوتا ہے جو دور کسی دوسرے شہر میں واقع  بینک کے سرکل آفس سے میرے نام آیا تھا ۔  سرکل آفس کا کہنا تھا کہ ہم نے اپنے بینک کی فلاں برانچ کا دس سالہ آڈٹ کیا ہے ۔ اس آڈٹ کے دوران یہ معلوم ہوا ہے کہ  آپکا ایک بینک کھاتہ پچھلے دس سال سے غیر فعال ہے اور اس میں اتنی رقم موجود ہے ۔  پندرہ دن کے اندر مطلع کیجئے کہ آپ اس بینک اکاونٹ کے ساتھ کیا سلوک کرنا چاہتے ہیں ۔ بصورت دیگر کھاتہ بند کر دیا جائے گا اور رقم بینک کے خزانے میں جمع کر لی جائے گی ۔

میں نے اپنے ذاتی کاغذات کی پڑتال کی ۔ بینک کو جوابی خط میں شناختی کارڈ کی کاپی کے ہمراہ تفصیلات سے آگاہ کیا کہ  بیان کردہ  کھاتہ تو میرا ہی ہے لیکن میرے پاس چیک بک موجود نہیں ازراہ کرم رقم میرے موجودہ بینک کی فلاں شاخ میں منتقل کر کے یہ پرانا کھاتہ بند کر دیا جائے ۔

ایک ہفتے کے اندر ہی میرے موجودہ بینک کھاتے میں منتقل ہو گئی ۔  میں پرانے کھاتے سے تمام رقم نکلوانے بعد اس کے متعلق بھول بھال چکا تھا ۔ غالبا میرے دوستوں اور شناساوں وغیرہ کے ذمے جو چھوٹی موٹی رقوم واجب الادا تھیں وہ مجھے مطلع کیئے بغیر پچھلے دس سالوں میں اس توقع کے ساتھ اُس کھاتے میں جمع کراتے رہے تھے کہ جب میں استفسار کروں گا تو مجھے بتا دیں گے جو میں نے کبھی نہیں کیا کیونکہ ذہن سے اتر چکا تھا ۔ قارئین کرام ، یہاں یہ بتا دوں کہ ملنے والی رقم میری  مطلوبہ ضرورت سے تقریبا دگنی تھی ۔

اندر کے مسلمان نے فخر سے کہا ” اب بتاو خدا سچا اور  قادر ہے یا مجبور محض “

نفس نے ہنس کر کہا  ” بے وقوف ، یہ محض اتفاق ہے “