گھر جاندی نے ڈرنا

دیوان سنگھ مفتون قیام پاکستان سے پہلے دہلی سے شائع ہونے والے ایک ہفت روزہ اخبار ” ریاست” کے کھرے اور انقلابی قسم کے ایڈیٹر تھے ۔ وہ گوجرانوالہ کے قریب ایک گاوں میں پیدا ہوئے اور ایک سیلف میڈ قسم کے انسان تھے ۔ ان کے اخبار ریاست میں معمول کی خبروں کے علاوہ اس دور کے راجے رجواڑوں اور مسلم ریاستوں کے نوابین کےاندرونی خفیہ راز سکینڈل کی صورت میں زیادہ شائع ہوتے تھے ۔ اس جرم کی پاداش میں وہ اکثر ہتک عزت کے دعووں کی جواب دہی کے لئے ان ریاستوں کی عدالتوں میں دھکے بے مزہ ہوئے بغیر کھاتے رہتے تھے ۔ اُن کی آپ بیتی کتابی صورت میں “ناقابل فراموش ” کے نام سے شائع ہوئی ۔ دراصل یہ ان کے اخبار میں قسط وار شائع ہونے والے مضامین کا مجموعہ تھی اور اپنے زمانے کی بیسٹ سیلر کتابوں میں شمار ہوتی تھی ۔ اس کتاب میں وہ کسی جگہ لکھتے ہیں کہ اگر کوئی شخص دل میں ٹھان لے کہ اس کے جنازے میں کم از کم سو افراد شریک ہوں تو اس کا اسلوب حیات بدل جاتا ہے ۔ یہ پڑھ کر مجھے  اسلامی تاریخ میں خلیفہ وقت کے زیر عتاب امام احمد بن حنبل یاد آ جاتے ہیں جنہیں خلیفہ نے اپنے حق میں فتوے کے حصول میں ناکامی پر کہا تھا ” میں آپ کو  عوام میں رسوا کر دوں گا ” تو امام نے کہا تھا ” کون رسوا اور کون معزز ہے اس بات کا فیصلہ ہمارے جنازے کر دیں گے ۔

  جدید میجمنٹ گرو ڈاکٹر سٹیفن آر کووی اپنی ساری عمر ہاورڈ یونیورسٹی میں بزنس پڑھاتے رہے  ۔ اپنی مشہور زمانہ کتاب “ُپر اثر لوگوں کی سات عادات ” میں جو ان کے بیان کے مطابق  پچھلے دو سو سالہ مینجمنٹ کے علم کا نچوڑ ہے ، اس بات پر زور دیتا ہے کہ انسانی زندگی کا کوئی نہ کوئی مشن ہونا چاہِے ۔ مشن کے بغیر زندگی ایسے ہی ہے جیسے بغیر سٹیرنگ کے کوئی سمندر میں تیرتا ہوا جہاز ، جو تیرتا تو رہتا ہے لیکن کبھی منزل پر نہین پہنچ پاتا کیونکہ اس کی کوئی واضح منزل نہیں ہوتی ۔ مشن زندگی میں کی جانے والی جدو جہد کو سمت دیتا ہے ۔ انسانی کوششوں کو بارآور کرنے میں مدد دیتا ہے  ۔ زندگی کے مشن کے تعین کے لئے وہ ایک مثال دیتا ہے کہ فرض کریں کہ آپ وفات پا چکے ہیں اور آپ کی میت کے گرد آپ کے دوست اور عزیز و اقارب جمع ہیں ۔ آپ بعد از وفات اپنے بارے میں اُن کے منہ سے جو سچے الفاظ سننے کے متمنی ہیں ۔  اصل میں وہی آپ کی زندگی کا مشن ہے ۔ مشن اور کچھ نہیں کرتا صرف انسان کا زندگی کو دیکھنے کا زاویہ نظر بدل دیتا ہے ۔ جب آپ کے مشن کا تعین ہو جائے تو اس بات کا ادراک کرنا ضروری ہے کہ آپ کی دوسروں پر اثر پذیری کے دو دائرے آپ کی ذات کے ارد گرد کھنچے ہیں ۔ پہلا وہ چھوٹا دائرہ جس میں موجود اشیاء پر آپ براہ راست اثر انداز ہو سکتے ہیں(جسے کووی سرکل آف انفلوئنس کا نام دیتا ہے) ، مثلا آپ کی ذات ،خاندان ، قریبی دوست احباب اور آفس وغیرہ کے معاملات ۔ دوسرا وہ بڑا دائرہ جس میں واقع اشیاء و معاملات پر آپ کی براہ راست اثر پذیری محدود ہے ( سرکل آف کنسرن) مثلا شہری و ملکی معاملات ، خطے اور دنیا کی سیاسی ، معاشی و جنگی پالیسیاں وغیرۃ -

اگر لکھے کا اعتبار کیا جائے تو یوں محسوس ہوتا ہے کہ بشمول میرے ، ہم میں سے زیادہ تر افراد اپنے ارد گرد کے ماحول ، اپنے ملک ، اپنی ملت اور اس دنیا کو سچے دل سے سنوارنا چاہتے ہیں ۔ اپنی اور دوسروں کی زندگیوں میں سکون ، امن اور ترقی چاہتے ہیں ۔ لیکن زیادہ تر یہ خواہش محض دوسروں پر تنقید و تنقیص  اور پند و نصائح کے ذریعے ٹھیک کرنے تک ہی محدود رہتی ہے ۔ ہم یہ سمجھتے ہیں کہ مجھ میں تو کوئی خرابی نہیں ، مستند ہے میرا فرمایا ہوا ، لیکن میرے ارد گرد کے لوگ اور ماحول اگر ٹھیک ہو جائے تو سب ٹھیک ہو جائے گا ۔ اس سلسلے میں ہمارا زیادہ تر وقت سرکل آف کنسرن میں گذرتا ہے حالانکہ یہ وقت سرکل آف انفلوئنس میں گذرنا چاہِے جس کا آغاز ہماری اپنی ذات سے ہوتا ہے ۔

صاحبو اپنی ذات کو ٹھیک کرنا دنیا کا سب سے مشکل ترین کام ہے ۔ اس عمل میں اپنی خواہشات کو محدود کرنا پڑتا ہے ، نفس کے بے لگام گھوڑے کو لگام ڈالنی پڑتی ہے ، صبر ، شکر  ، کوشش اور امید کا دامن پکڑنا پڑتا ہے ۔ لالچ ، حسد اور کینہ کو دل سے باہر نکال پھینک کر کردار کو مضبوط کرنا پڑتا ہے ۔ ادھر کووی کہتا ہے کہ اگر آپ کا اپنا کردار مضبوط نہیں تو آپ اچھے لیڈر نہیں بن سکتے اور بنا لیڈر بنے آپ اپنی قسمت اور اپنے ماحول میں تبدیلی نہیں لا سکتے ، صرف خواہش ہی کر سکتے ہیں ۔

میرا شمار بھی ان کمزور لوگوں میں ہوتا ہے جو محض قول کے سہارے اپنی قسمت اور دوسروں کو ٹھیک کرنا چاہتے ہیں لیکن اپنے چھے فٹ کے قلبوط کو ٹھیک کرنے کا سوچ کر وحشت ہوتی ہے ۔ میں اس معجزے کا منتظر رہتا ہوں کہ محض میرے کہے اور لکھنے سے سب کچھ بدل جائے گا ، ٹھیک ہو جائے گا ۔ میں بھی کامیاب لوگوں کی طرح زندگی میں بڑے کام کرنا چاہتا ہوں ، لمبی پلاننگ کرتا ہوں ، جس پر عملدرآمد کرنے کے لئے مناسب وقت کا منتظر رہتا ہوں اور اس بات کو نظر انداز کر دیتا ہوں کہ زندگی کی عمارت کی تعمیر ہمیشہ چھوٹی اینٹ سے ہوتی ہے ۔ چھوٹے چھوٹے  سرزد ہونے والے مثبت اعمال مل کر ایک بڑی شخصیت اور کامیاب زندگی بناتے ہیں ۔

صحیح اور مثبت سمت میں اٹھایا ہوا کوئی قدم بھی چھوٹا نہیں ہوتا ، راہ گذر پر پڑا ہوا پتھر اُٹھانا ، کسی کو پہلے سلام کرنا ، کسی مجبور کو اپنا قیمتی وقت دے کر اس کی بات سننا۔ آفس میں بلا غرض کسی کے کام آجانا ، بس میں کسی بوڑھے بابے یا مائی کو اپنی سیٹ پیش کر دینا اور اگر ان سب کی استطاعت نہ ہو تو دین کی رو سے کسی کی  خوشی کی خاطر محض مسکرا دینا بھی ایک نیکی ہے ۔

میرے پسندیدہ  مینجمنٹ گرو اور پنجابی شاعر میاں محمد بخش فرماتے ہیں۔

لوئے لوئے بھر لے کُڑیے ، جے تدھ بھانڈا بھرنا ۔

شام پئی بن شام محمد ، تے گھر جاندی نے ڈرنا ۔

اس سے پہلے کہ زندگی کی شام ، شام ہونے سے پہلے ہو جائے ، گھر واپسی کا خوف طاری ہو جائے ۔ محض تنقید ترک کر کے دوسروں کے لیئے مسکرانا شروع کر دیجئے ، کچھ تھوڑا وقت نکال کر بلا غرض دوسروں کے کام آجانا شروع کیجئیے ۔ پہلا قدم اُٹھائیے ۔ شاید اس طرح میرے اور  آپ کے جنازے میں لوگ ہمارے  متعلق وہی سچ کہیں گے جسے سننے کی خواہش ہم آج رکھتے ہیں ۔