ترقی کے گھوڑے

سات آٹھ سال کے ایک طویل عرصے کے بعد پچھلے نومبر  اپنے ننھیالی گاوں جانے کا اتفاق ہوا ۔ رات کو آرام کرنے کے بعد دوسرے دن اپنی بیگم اور چھ سالہ بیٹے کے ہمراہ کھیتوں کی طرف نکل گیا ۔ وہاں پہنچا تو ماموں کھیت میں بیلوں کی مدد سے ہل چلانے میں مشغول تھے ۔ بیگم اور بیٹا کچھ کھانے کی تلاش یں گاجریں اکھاڑنے میں مصروف ہو گئے ۔ بیٹا کسی گاجر کو اکھاڑنے کی کوشش میں زور لگاتا تو گاجر تو زمین ہی رہ جاتی مگر ہاتھ کی گرفت پھسلنے کی وجہ سے دھڑام سے زمین پر گرتا اور اس کے منہ سے زور کا قہقہہ نکلتا اور ہم بھی اس میں شریک ہوجاتے ۔ ماموں قریبی کھیت سے چند گنے توڑ کر لے آئے اور انہیں بیگم کے حوالے کرنے کے بعد اپنے کام میں جا کر دوبارہ مصروف ہوگئے ۔ میں جانتا تھا کہ انہوں نے صبح صادق کے وقت ہل چلانا شروع کیا تھا اور اس کام کو بارہ بجے سے پہلے ختم کرنا ضروری تھا ورنہ بیل مشقت اور گرمی کی وجہ سے نڈھال ہو جاتے۔ بیٹا اب گنا چوسنے کی  دھینگا مشتی میں مصروف تھا ۔ میں نے چاروں طرف پھیلے ہوئے سر سبز کھیتوں کی طرف نظر دوڑائی تو لگا جیسے میرے اندر ایک سکون کی لہر اترتی چلی جا رہی ہو ۔  میں شیشم کے سائے تلے پڑے ہوئے ماچے پر نیم دراز ہو گیا ۔میرے تصور میں بچپن کا زمانہ گھومنے لگا ۔

میری والدہ سکول کی چھٹیوں میں ہم بچوں کو لے کر اپنے میکے آ جاتی تھیں ۔ ننھیالی گاوں کے قریبی شہر تک کا سفر بس میں طے ہوتا اور اس کے بعد گاوں تک کا سفر تانگے میں ۔ چھوٹا ہونے کی بنا پر مجھے تانگے میں عین گھوڑے کے عقب میں تانگے کی سواریوں کے قدموں میں جگہ ملتی ۔ گھوڑا صاحب دوران سفر اپنی دم سے میرے منہ پر پچارا پھیرنے کا کام بڑی خوشدلی سے کرتے ۔ پتہ نہیں وہ جان بوجھ کر ایسا کرتا تھا یا مجھے ایسا احساس ہوتا تھا کہ دل میں بے اختیار یہ خواہش ابھرتی تھی کہ کب میں بڑا ہوں گا کہ سیٹ پر بیٹھنے کا حقدار ٹھہروں گا ۔ گاوں میں ابھی تک پکی سڑک اور بجلی کی نعمت یا زحمت نہیں پہنچی تھی ۔ گاوں کے عین درمیان میں جب ہم تانگے سے اترتے تو کنوویں سے پانی بھر کر جاتی ہوئی چنچل لڑکیاں سر پر دود دو گھڑے رکھے ہماری والدہ کے قریب سے گذرتی ہوئی سلام کرتیں ، حال پوچھتیں اور تیز تیز قدموں سے ہم سے آگے نکل جاتیں ۔ ان کی زبانی ہمارے آنے کی اطلاع ہماری خالاوں کو ہمارے گھر جانے سے بہت پہلے مل جاتی اور وہ گھر سے دوپٹے سنبھالتی قلانچیں بھرتی  ہوئی ہماری جانب اآتیں اور ہم بچے بھی وفور اشتیاق سے ان محبت کی پوٹلیوں سے لپٹ جاتے ۔

اپنے آباد ہونے کے زمانے سے یہ گاوں اپنی ایک لگی بندھی ڈگر پر رواں دواں تھا ۔ انگریزوں کے زرعی بندوبست کے تحت گاوں ایک منصوبہ بندی کے تحت آباد کیا گیا تھا ۔ گاوں کی گلیاں  بلا مبالغہ ایک دو رویہ سڑک سے زیادہ فراخ تھیں ۔ گاوں کے دونوں طرف میٹھے پانی کے کنویں تھے کیونکہ باقی زیر زمین پانی استعمال کے قابل نہیں تھا۔ پورا گاوں ایک آزاد اکائی(Independent Unit) کی مانند  تھا ۔ زراعت بیلوں کی مدد سے ہوتی تھی ۔ نہری پانی پر انحصار تھا ۔ گھر کی ضروریات کی تقریبا تمام اشیاء کھیت اور گاوں سے ہی دستیاب ہو جاتی تھیں ۔ سال بھر کی خوراک کے لئے گندم کٹائی کے بعد مٹی کے بنے ہوئے بھڑولوں میں سٹور کر لی جاتی تھی ۔ گڑ اور شکر وغیرہ دیسی طریقے سے خود ہی تیار کرنے کے بعد بوریوں میں بھر کر گھر کے سب سے بڑے اندھیرے کمرے میں رکھ دی جاتیں تھی جہاں دن کے وقت بھی اندھیرا چھایا رہتا اور صرف چھت پر جا کر مُگھ پر رکھی ہوئی پرانی ہانڈی اٹھانے کے بعد ہی سورج کی روشنی اندر آتی اور کچھ سجھائی دیتا ۔ ہر گھر میں دودھیل بھینسیں سیروں کے حساب سے دودھ دیتی تھیں ۔ دودھ بیچنا باعث عار سمجھا جاتا تھا  ۔ دودھ بلونے کے بعد مکھن تو استعمال کے لئے رکھ دیا جاتا البتہ لسی ضرورت مند افراد مانگ کر لے جاتے یا گھر میں کھناے کے ساتھ استعمال ہوتی ۔ غربت ضرور تھی مگر اس کا تلخ احساس نہیں تھا ۔ لوگ خوش باش رہنے کی کوشش کرتے تھے اور ہر غم کو اللہ کی مرضی سمجھ کر آنسو پونچھ کر صبر کر لیتے تھے ۔ صابن وغیرہ کے اجزا دکان سے خرید کر گھر میں ہی خواتین کپڑے دھونے کا صابن بنا لیتی تھیں ۔ مجھے سب سے مزیدار کام سویاں بنانے کا لگتا تھا ۔ گھر کے بوڑھے اور دانتوں سے محروم بزرگ افراد کے لئے آٹے کی  سویاں ہاتھ سے بٹ لی جاتی تھی بقیہ کے لئے ہاتھ سے چلانے والی مشین کی مدد لی جاتی تھی ۔

گندم کو گاہنے کے لئے ابھی تھریشر نہیں آئی تھی ۔ اگر تھی بھی تو صرف سرکاری محکمے اسے کرایے پر دیتے تھے اور کسان ان آلات کو مہنگا اور پیسے کا ضیاع جان کر اپنے زور بازو اور بیلوں کی مدد سے گندم گاہ لیتےتھے ۔ گھر میں جلانے کا ایندھن کھیت کے درختوں ، جھاڑیوں اور گوبر کے اپلوں  سے حاصل کیا جاتا تھا ۔ غریب غرباء شاملات دیہہ کی سرکاری زمین سے اپنے جانوروں کے لئے گھاس اور جلانے کی جھاڑیاں حاصل کر لیتے تھے ۔ ابھی جدید فیشن کی وبا نہیں آئی تھی چناچہ مائیں لڑکی کے پیدا ہونے کے وقت سے ہی جہیز کے لئے ایک ایک کپڑا جمع کرنا شروع کر دیتی تھیں جو گاوں کا جولاہا گندم کی معمولی سی سالانہ مقدار کے عوض کپاس کی فراہمی پر تیار کر دیتا تھا ۔ گاوں میں اشیاء کی خریدوفروخت زیادہ تر بارٹر سسٹم کے تحت ہوتی تھی ۔ گرمیوں کی تپتی دوپہروں میں ہم بچوں کو جب برف کے گولے کھانے کا شوق چراتا تو نانی ہم بچوں کے دامنوں میں گندم ڈال دیتی اور ہم اس کے عوض دکان سے انہیں دامنوں میں بتاشے ، نمک پارے ، اور ہاتھ میں گنڈا گولا لے کر لوٹتے ۔ شہر کا رخ صرف عدالت میں پیشی ، کسی جائیداد کے مقدمے کی کاروائی کے لئے تھانیدار یا تحصیلدار کے حضور حاضری اور بیٹی کے جہیز کے لئے سنار سے زیور بنوانے کے سلسلے میں ہی کیا جاتا تھا ورنہ شہر ایک دوسری دنیا تصور کیا جاتا تھا ۔ لوگ ایک دوسرے کے دکھ درد میں شریک ہوتے تھے ۔ اگر مجھے گھر کی تعمیر کرنی ہے تو میرے عزیز اور دوست دنوں بلکہ مہینوں بلامعاوضہ اس کام میں ہاتھ بٹاتے ۔ پیسہ کم تھا مگر محبت زیادہ تھی ۔

پھر اچانک پاکستانی گورنمنٹ کو ملک کو ترقی دینے کی سوجھی ۔ بڑے بڑے پراجیکٹس کا ڈول ڈالا گیا ۔ ہمارے گاوں کے قریب سے پہلی دفعہ ہائی پاور بجلی کی لائین گذاری گئی ۔ ریڈیو پر جدید طریقہ زراعت اور خاندانی منصوبہ بندی کا پرچار کیا جانے لگا ۔ ادھر خلیجی ریاستوں میں افرادی قوت کی مانگ بڑھ رہی تھی ۔ اکہتر کی جنگ میں شکست نے قوم کی روح کو مضمحل کر دیا تھا اور اس کا علاج اب اسلامی نظام کے قیام اور معاشی ترقی میں ڈھونڈا جا رہا تھا ۔ اسلامک سوشل ازم کے نام پر قوم کو روٹی ، کپڑا اور مکان کے دام میں گرفتار کیا جا رہا تھا ۔ میرے نانا کے گھر کے سامنے والے گھر کے باہمن (یہ گھرانا مسلمان ہونے سے پہلے ہندو برہمن تھا ) خاندان کے لڑکے اب سعودی عرب میں ائرپورٹ پر لوڈر کا کام کرتے تھے اور واپسی پر قیمتی گھڑیوں ، ٹیپ ریکارڈر ، غیر ملکی کپڑوں ، خوشبویات اور دوسرے قسم کے سامان سے لدے پھندے گھر لوٹتے اور چند دن کے قیام کے بعد اسی مزدوری کے جہنم میں جنت کی تلاش میں نکل جاتے ۔ گاوں میں اب پکی سڑک اور بجلی پہنچ چکی تھی ۔ ان دونوں کے آنے سے گاوں کے کلچر میں نمایاں تبدیلی آنا شروع ہو گئی تھی ۔ بجلی سے چلنے والی اشیاء کا حصول اب محبت پر مقدم تھا شہر تک آنے جانے کی آسانی نے جدید زمانے کی مصنوعات کو گاوں تک پہنچا دیا تھا ۔ اب مہمان کے آنے پر گھرکی شکر والی میٹھی لسی کی بجائے سیون اپ پیش کرنے کا رواج پڑ گیا تھا جبکہ اس سے پہلے اس کا استعمال صرف پیٹ میں درد کے مریض کے لئے ہی کی جاتا تھا ۔ لوگ اب پیسہ کمانے کی دوڑ سے واقف ہو رہے تھے تاکہ اپنی زندگی کو زیادہ سے زیادہ ماڈرن بنایا جا سکے ۔

ایسا لگتا ہے کہ عالمی سطح پر جنگ عظیم دوم کے بعد سرمایہ دار نے ترقی کے نظریے کا زبردست پرچار کیا تھا اور اس سلسلے میں بہت پیسہ خرچ کیا گیا تھا ۔ ایلون ٹافلر کے الفاظ میں یہ دوسری لہر کو پوری دنیا میں شدت سے ہیشقدمی کرانے کے عمل کا آغاز تھا ۔ ترقی کے اس نظریے کی شدت سے تبلیغ کی گئی کہ “تاریخ کا بہاو ، غیر متبدل طور پر ، انسانیت کے لئے ایک بہتر زندگی کی طرف گامزن ہے اور ہمیں اس بہاو کو تیز کرنے کے لئے کوشش کرنا چاہیے “۔ چناچہ کاروباری لوگوں اور کسانوں نے یکساں طور ہر نئی فیکٹری ، ہر نئی تیار کردہ شے ، ہر نئی رہائشی تعمیرات ، شاہراہ یا ڈیم برے سے اچھے یا بہتر کی جانب سفر جان کر اس کا استقبال کیا ۔  شاعروں ، ڈرامہ نگاروں اور مصوروں نے اس ترقی کو الوہی فریضہ اور حق سمجھ لیا کہ آخر ترقی ہی نے فطرت کی تباہی و بربادی اور کم ترقی یافتہ تہذیبوں کی فتح کا جواز مہیا کیا ۔ ایڈم سمتھ کے افکار ایک بائبل کی طرح معاشروں پر چھاتے چلے گئے حالانکہ “دولت اقوام ” میں ترقی انسانیت کا تصور نہیں تھا بلکہ تصرف ایک بنیادی پتھر تھا ۔

پاکستان میں بھی آنے والے زمانے میں ترقی کے نام پر حکومتی کوشش ، میڈیا کے ذریعے اور سرمایہ خرچ کر کے گاوں کے  آزاد یونٹ کو توڑا گیا ۔ نتیجتا ترقی کا تصور شہری زندگی سے وابستہ ہو گیا ۔ آبادی کی نقل مکانی دیہات سے شہروں کی جانب شروع ہوئی ۔ شہروں کا انفراسٹرکچر اتنی آبادی کے لئے نہیں بنایا گیا تھا چناچہ وہ اپنی آخری حد تک دباو کا شکار ہوگیا اور آج ٹوٹ پھوٹ کا شکار ہو چکا ہے ۔ شہر مسائلستان بن چکے ہیں ۔ گاوں سے نقل مکانی کرنے والا اب اپنے گاوں کی آزاد مٹی کی بوباس کی یاد کو سینے میں لئے شہر سے چمٹا ہوا ہے کیونکہ اس نے اپنی روح ترقی کی دیوی کے چرنوں میں دان کر دی ہے ۔

اور میں اس ماچے پر لیٹا ہوا یہ سوچ رہا ہوں کہ کیا اپنی مٹی سے ناطہ دوبارہ استوار کروں یا پھر اس سے دامن چھڑا کر اجنبی سرزمینوں اور ترقی کی شاداب چراگاہوں کی طرف نکل جاوں جہاں مزید ترقی میرا انتظار کر رہی ہے ۔ رہی بات روح اور فلاح کی تو اسے کون پوچھتا ہے ۔ ویسے بھی ترقی  فلاح کی دشمن ہے ۔ فلاح کا رخ انسان کے اندر کی طرف ہوتا ہے اور ترقی جسم پر توجہ مرکوز کرتی ہے ، انا کی پرورش کرتی ہے ۔ اسراف اس کا بنیادی پتھر ہے ، مسابقت اس کا تیل ہے جس سے ترقی کی مشین چلتی ہے ۔ مگر لگتا ہے کہ اب آ کر فیصلہ شاید میرے ہاتھ میں بھی نہیں رہا ۔ ایسا لگتا ہے کہ میں ترقی کی بگھی میں بیٹھا ہوا ہوں شاید اس بگھی میں بیٹھنے کا انتخاب میں  نے بہت پہلے کیا تھا اور اب اس کے گھوڑے پوری رفتار مجھے بھگائے لئے جا رہے ہیں ۔ میں انہیں روکنے کی کوشش کر رہا ہوں مگر وہ میرے اشاروں پر دھیان نہیں دے رہے ۔