فلسفہ کیا ہے

لغت میں فلسفہ کے معانی ہیں ۔ حُب دانش ، تجربہ ، مشاہدہ اور غورفکر سے اصول اخذ کرنا ، تلاش حقیقت ۔

پانی کے اجزائے ترکیبی عناصر (آکسیجن ، ہائیڈروجن) معلوم کرنا سائنس ہے اور یہ دریافت کرنا کہ کیا اس ترکیب اور نظام کے پیچھے کوئی دماغ مصروف عمل ہے ؟ فلسفہ ہے ۔ اقوام عالم کے عروج و زوال پر بحث کرنا تاریخ ہے اور وہ قوانین اخذ کرنا جو عروج و زوال کا باعث بنتے ہیں ۔ فلسفہ ہے ۔ فلسفی کائناتی مسائل کی حقیقت تلاش کرتا اور اقدار و معانی کا مطالعہ کرتا ہے ۔ افلاطون کہتا ہے کہ فلسفہ تلاش حقیقت کا نام ہے ۔ رواقیہ کے ہاں علم ، نیکی ، فضیلت اور ایسی دانش حاصل کرنے کا نام فلسفہ ہے جو خدائی مشیت سے ہم آہنگ کر دے ( رواقیہ فلسفیوں کا ایک گروہ تھا جس کا امام زینو(336۔264 قبل مسیح ایک ورانڈے میں بیٹھ کر درس دیا کرتا تھا ۔ عربی میں ورانڈے کو رواق کہتے ہیں)

موضوع کے لحاظ سے یونانی فلاسفہ کے مختلف طبقات تھے ۔

دہرئے ۔ جو خدا کے وجود سے منکر تھے ۔

طبیعی ۔ جو کائنات کی تخلیق ، عناصر ، نور و ظلمت ، اور حرکت و تغیر وغیرہ پر پحث کرتے تھے ۔ مثلا ایک یونانی فلاسفر کا عقیدہ تھا کہ سب سے پہلے پانی زمین پر نمودار ہوا پھر نباتات اور آخر میں حیوان کا ظہور ہوا ۔ انہیں فلالسفہ میں ایک پلاطبی نامی فلاسفر نے کہا کہ زمین متحرک ہے ۔

الہی ۔ یہ فلسفی عموما خدا اور اس کی صفات سے بحث کرتے تھے ۔ مثلا زینو اور فیثا غورث جس کی تعلیمات مہاتما بدھ کی تعلیمات سے ملتی جلتی تھیں ۔ ان کے ہاں حقیقی دنیا اس دنیا سے الگ ہے اور حصول کمال کے لئے عبادت ، تجرد اور گوشت سے پرہیز ضروری ہے ۔ فیثا غورث پہلا فلسفی تھا جس نے اجرام فلکی کے درمیان کشش کا نظریہ پیش کیا ۔ انکسا غوریس کے ہاں خدا ایک قوت کا نام ہے جو کائنات میں جاری و ساری ہے ۔ یہ کہیں آواز ، کہیں حرکت ، کہیں روشنی اور کہیں رنگ و بو میں تبدیل ہو جاتی ہے ۔

یونانی فلاسفہ کے مسائل

1 ۔ خدا و صفات خدا

2 ۔ ٹائم اور سپیس کی حقیقت

3۔ کائنات کی ابتدا

4۔ کائنات کی ماہیت

5۔  خیر و شر

6۔ غم اور خوشی

7۔ روح

8۔ عقل

9۔ حیات و ممات

10۔ مقصد حیات

فلسفہ مسلمانوں میں

یونانی فلاسفی کو الہام کی روشنی میسر نہیں تھی اور وہ صرف عقل سے کام لیتے تھے ۔ مگر اسلامی فلسفروں نے الہام کو بھی اسرار حیات حل کرنے میں استعمال کیا ۔  امام غزالی کے ہاں چھ علوم کا نام فلسفہ تھا ۔ ریاضی ، فزکس ، لوجک ، الہیات اور اخلاقیات ۔

مسلم فلاسفہ کے مختلف گروہ

1 ۔ جنہوں نے محض یونانی فلاسفہ کی شرح کی اور اپنی طرف سے کوئی نیا فلسفہ نہیں دیا ۔مثلا ابو بکر رازی ، آمدی ، غلام زحل بغدادی اور ملا صدرا شیرازی وغیرہ

2 ۔  جو یونانی فلسفی کی تشریح بھی کرتے اور تنقید بھی ۔ کندی ، فارابی اور سینا وغیرہ ۔

3۔ جنہوں نے یونانی فلسفہ کا ابطال کیا اور دنیا کو نیا فلسفہ دیا مثلا امام غزالی اور شعرانی ۔

4 ۔ جنہوں نے مسائل حیات کو فلسفے اور الہام کی مدد سے حل کرنا چاہا ۔ ان کے دو گروہ تھے ۔ معتزلہ جو فلسفہ کو مذہبی روایت پر ترجیح دیتے تھے اور دوسرے متکلمین جو الہام کو ہی حرف آخر سمجھتے تھے اور عقل کی اہمیت سے انکار کرتے تھے ۔

5۔ صوفیا جو حقیقت کو پانے کے لئے عشق سے بھی کام لیتے تھے ۔

6 ۔ حکمائے اشراق ۔ جن کے ہاں علم و یقین کا سب سے بڑا ذریعہ مراقبہ و عبادت تھا ۔ وہ کہتے تھے کہ مراقبہ سے دولت کشف نصیب ہوتی ہے ۔ تمام پردے نظروں کے سامنے سے اٹھ جاتے ہیں اور حقیقت سامنے آ جاتی ہے ۔

اسلام اور مسلمان فلسفیوں کے مخصوص مسائل

1 ۔ قرآن ازل سے ہے یا بوقت ضرورت اللہ پاک اسے بناتے اور نازل کرتے گئے ۔

2۔ انساںن کی تقدیر پہلے سے طے شدہ ہے یا اپنے ارادے میں با اختیار ہے ۔

3 ۔ اللہ کی صفات عین ذات ہیں یا غیر از ذات ۔

4۔ قیامت میں حساب کتاب انسانی جسم کا ہوگا یا صرف روح کا ۔

5 ۔ گناہ کبیرہ کا مرتکب فاسق ہے یا کافر ۔

6 ۔ مادہ ازل سے اسی طرح موجود ہے یا اللہ پاک نے بعد میں اسے حسب ضرورت پیدا کیا ۔

7 ۔ معجزہ دلیل نبوت ہے یا نتیجہ نبوت ۔

8 ۔ اقوام عالم کا عروج و زوال کسی قانون کا پابند ہے یا سب کچھ محض اتفاق سے ہو جاتا ہے ۔